Nuusbrief: November '03
Liewe Ondersteuner en Spanmaat,
Sedert ons vorige nuusbrief het sommer baie water in die see
gevloei. Persoonlik kon ek die JESUS-Film, soos in die verlede, met
groot vrug aanwend in mense se lewens.
Wat veral vir my ‘n hoogtepunt was, was toe ek een Sondag middag die
geleentheid gehad het om die tieners van NG Wonderboom-Poort te kon
bedien met ‘n praatjie oor "Die Grootste Liefdesbrief Ooit".
Uit die bykans 100 kinders het seker 75
gebid om Christus in hul lewens binne te nooi. Sommige by hernuwing,
maar die meeste van hulle vir die heel eerste keer in hul lewens.
Persoonlik kon ek verskeie kere met mense oor hul verhouding met
Christus gesels.
Verder het ek, en soms Magdaleen saam met my, letterlik duisende
kilometers afgelê en JESUS-Film spanne en ondersteuners van amper
regoor die land besoek. Behalwe al die besoeke in Pretoria, was
ek o.a. in Pietersburg, Harrismith, Rustenburg, Nelspruit,
Lichtenburg, Kimberley, Komatiepoort, Warmbad, Groblersdal
en verskeie dorpe in die Vrystaat. As jy net dink dat elk van
hierdie besoeke byna ‘n week geduur het, dan kan jy jou net indink aan
die arme "weduwee en wesies" wat die fort moes hou in
pappa se afwesigheid! Aan die einde van die dag kan ek net sê dat dit
uiters suksesvol was, en dat die Here elke tree saam met my was.
Nou, aan die einde van die jaar wil ons elkeen van ons spanlede
baie spesiaal bedank vir ‘n besondere aandeel in ons span. Dankie
dat ons op jou kan staatmaak, en weet dat dit die Here is wat jou
hart positief voorberei het.
Pieter Brits
Vooruitsig vir die Nuwe Jaar
Vanaf begin volgende jaar is daar groot veranderinge in die pyplyn
rakende myself en Magdaleen. Met ons vorige nuusbrief het ons al
‘n bietjie gedeel, maar ook daar is al weer wysigings aangebring. Vir
’n groot sendingorganisasie soos Campus Crusade for Christ om dinamies
te bly, moet daar voortdurend veranderinge plaasvind, nie net tot
voordeel van die Koninkryk nie, maar ook tot voordeel van die
organisasie en die personeellid self.
- Ek en Magdaleen is gevra om betrokke te raak in die opleiding
van nuwe personeel by CCC in die Gauteng distrik. Dit is ‘n 9
maande intensiewe opleidingsprogram en ons sal verantwoordelik
wees vir ’n groot deel van die lesings. Met ons eie unieke gawes van
lering, glo ek dat dit regtig van BO is.
- Verder gaan ek steeds die voltydse (salaris) JESUS-Film spanne
wat ek oor die afgelope 4 jaar gevestig het, administreer.
- Soos in die verlede, sal ek steeds CCC se groepversekering, polisse
en annuiteite se premies maandeliks moet konsolideer en vir die
finansiele kantoor deurgee vir korrekte aftrekking uit die personeel se
rekeninge.
- Verder is ek gevra om betrokke te wees in beide die "Church
Resource" en "Coverage" bediening in Tshwane. Dit kom
daarop neer om vir elkeen in Tshwane nog ‘n geleentheid te gee
om van die Goeie Nuus van Jesus Christus te hoor.
Wie van julle het al ooit hierdie koffiepot by die ingang van
Koffiefontein in die Suid-Westelike deel van die Vrystaat gesien?
Toe ek laat een middag hier verby gekom het, het ek van
opgewondenheid gejuig, met die hoop op heerlike koffie vir
‘n moeë reisiger.
Al ooit gehoor van die dorpie waar die treinspoor regdeur die
dorp se hoofstraat loop?
Toe ek 14 jaar gelede vir die eerste
keer deur Fauresmith gery het, het die trein juis deurgekom.
Saam met die ander motors moes ek ook uitdraai sodat die ou groot
ysterreus rustig kon deurry.
Nie net een keer nie, maar ‘n hele paar keer moes ek op
plattelandse paaie deur soortgelyke hekke gaan. Stop - oop maak -
deur ry - stop - toe maak - verder ry.
Wanneer mens dan alleen uitklim op daardie verlate vlaktes, besef
jy weer opnuut hoe groot God se skepping is.
Wanneer ek so alleen op die ver paaie ry, dan sing ek lofliedere
tot my keel hees is, bid en huil sommer so deurmekaar.
Wat ‘n voorreg om vandag mens te wees!
Nie aldag dat 'n man 50 jaar oud word nie.
Die naweek van 31 Oktober het Magdaleen my geblinddoek en vir
'n volle uur draaie met my gery. Nadat ek toegelaat was om die
doek oor my oë te verwyder, was ek sprakeloos: Ons was by 'n
prentjie-mooi houthuisie langs Hartebeespoortdam.
Ons huisie vir 'n hele naweek - alleen!
Met Carel, (een van my vorige dissipels) se troue te Bergville,
kon ek en Magdaleen 'n hele dag lank in die Drakensberge
rondstap.
Hier klim Magdaleen teen 'n kettingleer op in die "gorge" by
Mount Aux Sources.
Interessante Statistieke van Campus Crusade for Christ,
Internasionaal
- CCC het 25 520 personeellede
- Voltydse personeel, of bedieninge, in 190 lande
- Sedert die bediening in 1951 begin het, is 6.7 biljoen mense
wêreldwyd blootgestel aan die evangelie deur CCC, of vennootskap
aktiwiteite
- Die JESUS-Film is vertaal in 812 tale
- Van die bykans 5.6 biljoen mense wat die JESUS-Film gesien het,
het 193 miljoen ‘n keuse vir Christus gemaak
"On the average, someone somewhere in the world has come to Christ
through Campus Crusade ministries and partnerships every 1.8 seconds,
24 hours a day, every day of the year"
(2001 Global Ministry Report)
Seënwens:
Ons bid die Here se seën en beskerming oor jou en jou familie toe.
Mag jy Christus se vrede en liefde gedurende hierdie Kerstyd ervaar.
Gebruik hierdie rustyd om nie net nader aan jou gesin en familie
te kom nie, maar ook aan jou Skepper.
Back to news.
Back to top.
Contact Pieter: pieter at hope365 dot co dot za
or 082 469 6724